தீ

அவளிடம் நான் ஒரு

பூவைக் கொடுத்தேன்

அவள் அதைத்

தீப்பொறியாக மாற்றினாள்

அதன் நறுமணம் சீறியெழுந்து

ஒளிப்பிழம்பாகக் கனன்றது

அதன் மென்மை

என் முகத்தில் காறி உமிழ்ந்தது

அவள் சொன்னாள் ;

“ எழுதுங்கள் தீ ”

படிப்பறிவில்லா சில

தொழிலாளர்கள்

வயல்களில் நாள் முழுதும்

பாடுபட்ட களைப்போடு

தலைகளைச் சாய்த்துக் கொண்டு

தமது கரும்பலகைகளில்

எழுதுகுச்சிகளால்

தட்டுத் தடுமாறி  எழுதினார்கள்

” தீ “

மீண்டும் அவள் சொன்னாள் ;

“ இன்னொரு தடவை தெளிவாக

எழுதுங்கள் – தீ “

தலைகளைச் சாய்த்துக் கொண்டு

அவர்கள் எழுத ஆரம்பித்தார்கள்

இம்முறை

அதிக நம்பிக்கையோடு

கரும்பலகைகளின் மேல்

நகரும்

அவர்களின் விரல்கள்

தீச்சுடர்களாக மாறியதை

நான் கண்ணுற்றேன்.

அந்த சொல்லை

எழுதி முடித்தபோது

அவர்களுடைய கைகள்

தீப்பந்தங்களாக

ஒளிர்ந்து கொண்டிருந்தன. 

“ இதோ உங்களுக்கு தேவையானால்

இப்போது எடுத்துக் கொள்ளுங்கள் “

சொல்லிக்கொண்டே அவள்

அந்தப் பூவைத் திரும்ப

என்னிடம் கொடுத்தாள்.